古天樂都要拍網劇了
影帝古天樂早前罕有客串內地劇集《狩謊》，相隔25年再拍劇，令唔少人都覺得相當意外。
點知佢出年仲會將驚喜升級，首度涉足內地網劇，同知名導演馬楚成合作打造新作，題材更係港劇拿手嘅警匪劇。
呢次係二人自2007年電影《生日快樂》之後，相隔20年再度合作，而家正處於前期籌備階段。
之但係講開古老闆今次踏入網劇新戰場，促成合作嘅契機，正正就係客串《狩謊》嗰場戲。
當時劇組有兩個演員受傷，加上拍攝進度超時，令到演員檔期未能遷就，身處內地嘅監製馬楚成就聯同多個導演返到香港幫手埋尾，先至令作品順利完成。
正因為馬楚成返嚟幫拖，先至有機會同古老闆再次碰面，二人聚舊傾偈，同時講起出年嘅合作計劃。
既然大家都咁熟，所以傾起新合作都相當順手。
有傳今次古老闆擔正嘅網劇係由內地公司投資，但馬楚成為咗令香港劇組有更多工作機會，正喺度游說大隊到港開工。
而成毅主演嘅《狩謊》，之前亦都係佢向有關方面游說，先至成功拉隊到港拍攝。
馬楚成以短訊受訪時就回覆，話確認有計劃，但就冇講細節，對於係咪因為《狩謊》超時先至返香港埋尾，佢就話無可奉告。
話時話，古老闆而家已經化身吸金達人，密密拍廣告同商演，工作排到出年，農曆新年仲會去美國開騷。
之前8月，佢喺紅館舉行入行33年首個個人演唱會《MY FIRST SHOW 2026》，兩場完結之後，粉絲都期待佢後續巡唱。
睇返古老闆近年投資同主演嘅電影方面，雖然幾部作品嘅票房都有起有跌，但投資大，回本唔容易。
好似今年年初上映嘅《尋秦記》，古老闆親自監製兼主演，原班人馬回歸，港澳開畫首日票房就破千萬，創香港電影開畫紀錄，之後港澳累計超過5千萬，內地累計票房2.91億。
不過電影嘅製作成本就更高，之前有傳整體成本至少2.5億，所以分賬之後仍然難以回本，帳面虧損估計至少過億。
再早啲嘅《明日戰記》同樣重金打造，香港票房破6千萬創紀錄，但加埋內地票房仍然無法跨過回本線，虧損都係以億計。
至於10月上映嘅《偵戰》，內地最終票房400幾萬，港澳上映後票房亦未見起色，只有200幾萬，呢部投資近億嘅電影，總票房加埋都唔過千萬，同樣「蝕到入肉」。
而9月時，古老闆同旗下天下一電影製作有限公司，仲被一間英屬處女群島註冊嘅離岸公司入稟高等法院，追討近1.49億嘅欠款。
入稟狀指2019年9月雙方簽訂定期貸款融資協議，本金7000萬，原月息1%，逾期升至1.5%，原本2020年9月還款，之後兩度延期至2022年12月。
但截至今年8月底，佢哋只係償還約1390萬，而連本帶利累計欠款係149,382,227。
古老闆公司之後發聲明指原告案情不完整，尤其未披露曾經被剔除公司註冊並解散近3年，期間一直無法聯繫到授權負責人。
同時又指原告違反無損害原則同合約約束嘅披露，公司保留追究權利，案件已經進入司法程序，現階段不便進一步評論。
而古老闆嘅工作就已經排到出年，廣告、商演、演唱會等等，而家再加埋網劇，似乎真係要密密吸金、密食當三番～
*以上内容系网友风平浪静自行转载自金句王，该文仅代表原作者观点和态度。yeeyi号系信息发布平台，仅提供信息存储空间服务，不代表赞同其观点和对其真实性负责。如果对文章或图片/视频版权有异议，请邮件至我们反馈，平台将会及时处理。